Ísland er frábær áfangastaður fyrir bæði hvalaskoðun og fuglaskoðun. Ferðirnar okkar einblína aðallega á sunnanverðan Faxaflóa, rétt utan við Reykjavík. Hafstraumar flóans skapa góðar aðstæður fyrir ýmsar fæðutegundir og langvarandi sólarljós á sumrin veitir smágerðu svifi rétt umhverfi sem skapar fjölbreytni í flóanum. Áhöfnin vinnur náið saman með farþegum við að koma auga á dýralífið sem gerir hverja ferð spennandi og einstaka.
Eins og er, er vitað um allt að 85 mismunandi tegundir hvala og höfrunga í heiminum. Þessar tegundir telja allt frá stærstu dýrum jarðar frá upphafi til þeirra minnstu. Þær er að finna í öllum heimsins höfum og jafnvel í sumum ám. Hver sá sem hefur farið í hvalaskoðun og séð þessar mögnuðu verur í návígi, getur sagt þér að það sé upplifun sem gleymist seint og tilfinningin sem maður fær við upplifunina er nánast ólýsanleg.
Sjófuglar eru mikilvægur þáttur í hvalaskoðunarferðum okkar þar sem þeir leiða okkur oft til hvalanna. Yfir sumarmánuðina gera lundarnir vart við sig en einnig sjáum við súlur, fýla, langvíur, kríur og aðrar tegundir. Á veturna er fuglalífið ekki eins fjölbreytt, en það er gaman að sjá ákveðnar tegundir á svæðum sem maður myndi venjulega ekki sjá þær.
Hafið sem umlykur Ísland er fæðuríkt, fjölbreytt og fullt af lífi, og fiskimiðin á Íslandi eru einhver þau frjósömustu í heimi, en Faxaflói er engin undantekning þar á. Ýmsar tegundir fiska finnast í sjónum rétt fyrir utan Reykjavík, þá helst er að nefna þorsk, ýsu, makríl, ufsa og steinbít.
